सल्यान,१९ चैत। गायक तथा संगीतकार चेतन राईले नयाँ वर्षको छेको पारेर नयाँ गीत सार्वजनिक गर्ने भएका छन। पछिल्लो समयमा नेपाली साँगीतिक क्षेत्रमा सक्रियता बढाउन थालेका उनले यतिबेला राष्ट्र भाव झल्केको गीत पस्कन लागेका हुन् ।
सञ्चारकर्मी राजाराम पौडेलको शब्द रचनामा तयार भएको गीतमा आवाज र संगीत राईको नै रहेको छ । गीतको एरेन्ज आरबी सेङदनले गरेका छन ।
आफ्नै गृह जिल्ला सल्यानमा छायाकंन गरिएको गीतलाई दर्शक श्रोताले रुचाउने राईको विश्वास छ । गीतको भिडियोमा समेत राईले अभिनय गरेका छन् । सुजन महरको छायाङ्कण गरेको भिडियोको निर्देशन मनोज कुमार सुनुवारले गरेका हुन् । गीतको भिडियो राईले आफ्नै युट्युब च्यानल चेतनराई अफिसियलबाट सार्वजनिक गर्नेछन्। यो गीत राईको चौथों एलबम ‘स्टेज’मा समाबेश हुनेछ।
सल्यान जिल्लामा जन्मेका गायक राईले पप तथा आधुनिक विधाका गीत गाउने गर्दछन । उनको पहिलो एलबम सन् २०१० मा बजारमा आएको थियो । ‘सेभेन’ नामको यो एलबमले दर्शक श्रोतामाझ उनलाई त्यस समयमा परिचित गरायो । त्यसपछि सन् २०१५ मा दोस्रो एलबम ‘साउण्ड’ निकाले । केही वर्षको अन्तरालमा तेस्रो एलबम ‘स्टेप’ उनले पस्केका थिए । एकपछि अर्को साँगीतिक कोसेली पस्केका उनी देश तथा विदेशका कार्यक्रममा समेत व्यस्त हुन थालेका छन् ।खबर आजको टिमको तर्फबाट सर्जकको गीतको पुर्ण सफलताको कामना।